MZEE WA BARAZA LA MAHAKAMA YA MWANZO JELA MIAKA 3 KWA RUSHWA YA TSHS 50,000.

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399. 

Na  Walter  Mguluchuma .

         Mahakama  ya  Wilaya  ya  Mpanda  Mkoani   Katavi  imemuhukumu    Mzee  wa    Baraza   wa   Mahakama ya  Mwanzo ya   Mpanda  Mjini   Anna  Mlugala  59 kifungo  cha miaka    mitatu  jela   baada ya  kupatikana      na  kosa  la kupokea   Rushwa ya  Tshs 50,000  kutoka  kwa  mshitakiwa   ambae  alikuwa na  kesi kwenye   Mahakama ya  Mwanzo ya   Mpanda  Mjini.

Hukumu  hiyo  ilitolewa   na  Hakimu  Mkazi   mfawidhi wa  Mahakama ya  Wilaya ya  Mpanda  baada ya  kulidhika  na  ushahidi  uliotolewa  Mahakamani  hapo na  upande wa   mashita   ulioongozwa  na   Mwendesha  mashitaka  wa  TAKUKURU    wa  Mkoa   wa   Katavi   Simon Buchwa .

Awali   mwendesha  mashitaka wa   TAKUKURU    Simon     Buchwa   alidai   mahakamani  hapo  kuwa   mshitakiwa   Anna   Mlugala   alitenda  kosa  hilo   hapo   Mei  21  mwaka  2015  katika   eneo  la   Mtaa wa   Makanyagio     Manispaa ya   Mpanda .

Mshitakiwa  siku  hiyo     anadaiwa   kuwa  aliomba   rushwa ya  Tshs 50,000  kutoka   kwa   Noelia   Kakusu  ili  aweze kumsaidia  kesi yake alyokuwa  ameshitakiwa katika  Mahakama hiyo ya  Mwanzo ya kuharibu   mali .

Mwendesha   mashitaka  Buchwa   alliambia    Mahakama  kuwa  mshitakiwa   alikamatwa   baada ya   Taasisi ya  kupambana  na  kuzuia  Rushwa  kupata  taarifa  za   mshitakiwa  kuomba    Rushwa kiasi  hicho cha  fedha .

  Alidai kuwa baada ya  TAKUKURU  kupata  taarifa  hizo  ndipo walipoweza  kuandaa  mtego na  waliweza  kufanikiwa  kumkamata    mshitakiwa    akipokea  kiasi  hicho cha  fedha    katika  eneo  lilikuwa  jirani la  Mahakama  hiyo ya  Mwanzo ya   Mpanda  Mjini

Katika  utetezi wake  mshitakiwa  ambae  alikuwa na  mashahidi watatu   alidai kuwa   fedha walizomkamata  nazo  hakuwa  amepewa  kama   rushwa  bali   alikuwa   amepewa  ili   akamnunulie   vifaa  vya kujifungula   Noelia   Kakusu   ambae   alikuwa ni   mjamzito .

Madai  hayo  yalipingwa  vikari na  mwendesha  mashitaka  wa  TAKUKURU   Buchwa  kwa  kile   alichoeleza      kuwa  kitendo cha  mshitakiwa  Anna   Mlugala  kutoka  Mahakamani wakati   kesi   ikiwa  inaendelea na  kutoka   nje ya  Mahakama  na  kwenda  kuchukua  fedha    kwa  Noelia ni  ushahidi  tosha  kuwa  mshitakiwa  huyo   alikuwa  amedhamilia  kuchukua  rushwa  hizo  ambazo  alikamatwa  nazo kufuatia mtego uliowekwa na TAKUKURU.

Hakimu   Chiganga    baada ya kusikiliza  ushahidi  uliotolewa   Mahakamani  hapo na  pande  hizo  zote  mbili  ambapo  upande  wa  mashitaka ulikuwa na  mashahidi wanne na mshitakiwa watatu  aliiambia   Mahakama  kuwa  pasipo shaka  yoyote    mshitakiwa  amepatikana  na  hatia  ya kosa la kifungu cha  sheria  Namba 15 ya kudhibiti  na kupambana  na  Rushwa   Namba   11 ya  mwaka   2007.

Hivyo   Mahakama  imemuhukumu  Anna   Mlugala  kutumikia  kifungo  cha  miaka      mitatu  jela  au  kulipa  faini  ya  Tshs  500,000  hadi  Mahakama  ilikuwa  imemaliza  kazi  zake  mshitakiwa   alikuwa  hajalipa   faini  hiyo.

MWISHO